MEDIA RELEASE 31st JANUARY, 2014

Ma’u e Pa’anga Loi

 

            ‘OKU ‘i ai ‘a e hoha’a mei he Potungaue Polisi Tonga felave’i ‘eni pea mo hono puke mai ‘o ha ongo la’i pa’anga loi taki $50, pea ‘oku hoko atu leva ‘enau ngaue ki hono fakatotolo’i pe ko e hu’u ‘a e pa’anga loi ko ‘eni mei fe pehee ki hono kumi ‘a kinautolu ‘oku nau ngaue ta’efakalao ki hono fa’u ‘o e pa’anga loi ni.

          Kuo ‘osi puke mai ‘e he kau Polisi ha talavou ‘i he ‘aho 31 ‘o Sanuali, 2014 fakataha pea mo ha la’i $50 kuo fakapapau’i ko e pa’anga loi pea ‘oku lolotonga tauhi fakalao ‘a e talavou ni ka e fakakakato ‘a e ngaue ki ai.

          Na’e ‘uluaki fakahoko ha launga mai ki he kau Polisi mei ha Falekoloa ‘i he Hala Vaha’akolo ‘i Havelu fekau’aki ‘eni pea mo ha fefine na’a ne ‘alu ange ke fakatau’aki ha la’i $50, pea ko e lolotonga hono to’o ‘e he faifakatau ke fakapapau’i pe ko e pa’anga mo’oni ‘eni kuo lele ‘a e fefine ia.

          Na’e puke mai ai ‘e he kau Polisi ‘a e la’i $50 ko ‘eni pea kuo ‘osi fakahoko ‘a hono fakapapau’i ko e pa’anga loi mo ia.

          Kuo ‘osi lipooti foki mei he Pangike Pule Fakafonua ‘o Tonga kuo nau ‘osi ma’u mo ha la’i pa’anga ‘e $50 kuo nau ‘osi fakapapau’i ko e pa’anga loi mo ia.

          ‘Oku ‘oatu ai ha fakatokanga mei he Potungaue Polisi ki he kakai ‘o e Fonua tautefito ki a kinautolu ‘oku ‘i ai honau ngaahi falekoloa, kau ki ai ‘a e kau fakamaketi mo e kau fakatau fea ke nau toe tokanga ange koe’uhi ‘oku ‘i ai ‘a e tui kuo mofele holo ‘a e pa’anga loi.

          ‘Oku hokohoko atu pe ‘a e ngaue ‘a e Potungaue Polisi ki hono fakatotolo’i ‘a e me’a ni, pea ‘oku ‘i ai ‘a e kole ai ki ha taha pe ‘oku ne ‘ilo ha fa’ahinga fakamatala fekau’aki mo e ngaue ta’efakalao ko ‘eni ke nau fetu’utaki mai ki he fika telefoni 922.

 

‘Unga Fa’aoa

Komisiona Polisi Le’ole’o